როგორ მოვემზადოთ აღდგომის ბრწყინვალე დღესასწაულისათვის

როგორ მოვემზადოთ აღდგომის ბრწყინვალე დღესასწაულისათვის

361
0
SHARE

ქრისტე აღსდგა!!! ჩვენი მაცხოვრის, იესო ქრისტეს აღდგომა – ეს უდიდესი დღესასწაულია ქრისტიანულ დღესასწაულებს შორის! მეორენაირად ის განიმარტება როგორც ცოდვაზე გამარჯვების ზეიმი. აღდგომის დღესასწაული 12 საუფლო დღესასწაულებს შორის ყველაზე მნიშვნელოვანია, შესაბამისად ქრისტიანული სამყარო განსაკუთრებული პასუხისმგებლობით და რწმენით ეკიდება ამ უდიდესი დღესასწაულის მოახლოებას და ცდილობს მაქსიმალურად ეზიაროს უფლისკენ მიმავალ ჭეშმარიტ გზას. აღდგომას წინ უსწრებს ყველაზე ხანგრძლივი და მძიმე, 48 დღიანი მარხვა. ძალიან დიდი დატვირთვა აქვს მარხვის ბოლო კვირას, ბზობის დღესასწაულიდან უფლის ბრწყინვალე აღდგომის დღესასწაულამდე, რომელსაც ვნების შვიდეულის სახელით მოიხსენიებენ. თითოეული ქრისტიანისათვის ბოლო კვირა ეს არის სინანულის, დაფიქრების, პატიების, უფალთან დაახლოების შვიდეული, რომლის დროსაც ის მაქსიმალურად ცდილობს ჩაუღრმავდეს საკუთარ მეს და განიცადოს სინანული.

უფრო კონკრეტულად კი, უფლის იერუსალიმში შებრძანების ანუ ბზობის შემდგომ, ვნების შვიდეულში დღეები შემდეგნაირად ნაწილდება:

  • დიდი ორშაბათი – “რასაც ლოცვაში ითხოვთ, გწამდეთ, ყველაფერს მიიღებთ და მოგეცემათ..” ამ დღეს ეკლესია დიდი სინანულისაკენ მოგვიწოდებს. მართლმადიდებელი ეკლესია ამ დღეს უნაყოფო ლეღვის გახმობას იხსენებს. უნაყოფო ლეღვი იმ ქრისტიანების სულის სიმბოლოა, რომელნიც სინანულის ნაყოფს არ ისხამენ.
  • დიდი სამშაბათი – ეს არის დიდი ორშაბათის გაგრძელება, დაფიქრების დღე, ვიხსენებთ ათი ქალწულის შესახებ იგავს, რათა ვისწავლოთ სულიერი გონიერება და სიფხიზლე და მზად ვიყოთ იმ მოულოდნელი წამისთვის, როცა – “სიძე მოვალს შუაღამესა”.
  • დიდი ოთხშაბათი – ეს არის იუდას მიერ იესო ქრისტეს გაცემის დღე, დღე სინანულისა, როდესაც თითოეული ქრისტიანი აცნობიერებს მის ცოდვებს და ინანიებს.
  • დიდი ხუთშაბათი – ეს დღე იმით არის ძალიან გამორჩეული, რომ ეს ერთადერთი დღეა მთელი წლის განმავლობაში, როცა, საჭიროების შემთხვევაში, მირონის კურთხევა შეიძლება. ამ დღეს მართლმადიდებელი ეკლესია იხსენებს იესო ქრისტეს მიერ მოწაფეთათვის ფეხთა დაბანას, გეთსიმანიის ბაღში იესო ქრისტეს ლოცვასა, საიდუმლო სერობას და იუდას მიერ მის გაცემას.
  • წითელი პარასკევი – ეს არის უფალი ისეო ქრისტეს ჯვარცმის დღე და ყველაზე მძიმე დღე მთელი მარხვის პერიოდში. უდიდესი სინანულის და დაფიქრების წუთები. ამ დღეს მართლმადიდებელი ეკლესია ღებავს წითელ კვერცხებს.
  • დიდი შაბათი -ეს დღე იესო ქრისტეს ხორცით საფლავში, სულით კი ჯოჯოხეთში ჩასვლას და ბოლოს, მაცხოვრის მკვდრეთით აღდგომას ეძღვნება.
  • ადღგომის ბრწყინვალე დღესასწაული! – დღე რომელიც უდიდესი სიხარულის და ცოდვაზე გამარჯვების ზეიმია, ამ დღეს ყველა ქრისტიანი უდიდესი სიხარულით და ზეიმით ეგებება! ქრისტე აღსდგა!

ვნების შვიდეულის მოკლე მიმოხილვის შემდგომ, აუცილებელია იმაზე საუბარიც, თუ რა უნდა დაახვედროს ქრისტიანმა ამ უდიდეს დღესასწაულს.

წითელი კვერცხი – მისი შეღებვის ტრადიცია სწორედ რომ ამ დღესასწაულს უკავშირდება. წმინდა მარიამ მაგდალინელმა იმპერატორ ტიბერიუსს კვერცხი მიართვა და აღდგომის დღესასწაული ახარა, წარმართმა ტიბერიუსმა კი გაიღიმა და თქვა, რომ ის ამ კვერცხის გაწითლებას უფრო დაიჯერებდა ვიდრე მიცვალებულის აღდგომას. ამ დროს კვერცხი წითლად შეიღება. სწორედ აქედან ეყრება საფუძველი აღდგომის დღესასწაულზე წითელი კვერცხების ტრადიციას, რომელიც ძალიან მნიშვნელოვანია თითოეული მართლმადიდებელი ქრისტიანისათვის, სააღდგომო სუფრისათვის კი აუცილებელი ატრიბუტი.

სააღდგომო პასქა – იგივე კულიჩი, ის განასახიერებს გოლგოთას მთას, მთას რომელზეც იესო ქრისტე ჯვარს აცვეს. ქრისტიანები პასკას ქრისტეს აღდგომის რწმენის ნიშნად მიირთმევენ. ამ დღისთვის გამომცხვარი პასქა მაცხოვარს გვახსენებს, რომელიც ამბობს: “მე ვარ პური ზეცით გარდამოსული”.

ქოთანში დათესილი ხორბალი და მწვანე ჯეჯილზე გაგორებული წითელი კვერცხები – ეს სიკვდილზე გამარჯვების სიმბოლოა.